قضايا و حوادث استاذة جامعية تنشر شهادة حول الطالب عطيل شادلي الذي تم ايقافه خلال الاحتجاجات الأخيرة وحكم عليه بسنة و6 اشهر سجنا
نشرت استاذة جامعية شهادة حول الطالب عطيل شادلي الذي تم ايقافه خلال الاحتجاجات الأخيرة وحكم عليه بسنة و6 اشهر سجنا ورد فيها ما يلي:
"هذا عطيل شادلي étudiant عندي يقرى 3 اجازه اساسيه في المحاسبه في ISCAE، السنا المفروض يتخرج.. منعرفوش بصفه خاصه اما نعرف انو وليد عاقل و حدو حد روحو، أمو قيمة بمعهد المروج وبوه رئيس مركز للحرس الوطني خوالو اساتذه.
أمو عندها tension في عينيها والدواء تاخذو في الليل لقاتو وفى ومع السابعة متاع العشية خرج للصيدلية على بعد أمتار من دارهم عرضوه باقا متاع الحاكم عيّطلو مشالوا قاللهم راهي دارنا هوني وماش للفارماسي ورّاهم الوصفة الطبية ودبوسة الدواء قطر الفارغة.
كمشوه وحطوه في الكرهبة في المحضر حطولوا تكوين وفاق للاعتداء على مقر عزيزه إلي هي في الأصل تبعد كيلومترات على دارهم... ليوم عطيل تحكم ب عام و نص حبس حسب المعلومات التي عندي تم سلب عطيل من أبسط حقوقه ومن أبسط الضمانات القانونية التي تضمنها المجلة الجزائية في طور الإيقاف.
-لم يتمّ اعلام العائلة بالإيقاف
- لم يتم تمكينه من إنابة محامي
- لم يتمّ اطلاعه على محضر البحث
- تمّ الضغط عليه تحت الإكراه والتعنيف الجسدي للإمضاء على المحضر دون قرائته
- تم تدوين اعترافات لم ينطق بها
- لم يتّم سماعه في المحكمة
وكل هذه المعطيات أعلم بها والدته لدى زيارته بعد الحكم عليه.... هذي بلادنا بعد الثوره!
الطالب التونسي لايزي يجيك محبط خاطر المستقبل غايب لا يزي احنا نزيدو نحبطوه و نظلموه، و لنفترض خرج يتظاهر مع صحابو خاطرو فد و تيقر من الهم مادام ما سرقش و نهب حقو مكفول ما تجيش تلفقلو قضيه و تقضي على مستقبلو الاصل في القانون هو العدل و الانصاف و التي نشوف فيه انتقام و تشفي سياسي.... يحبو يقولولك هاو اش باش يصيرلك نهارة التي تخمم تهز راسك و تقول لا للفساد و التفقير...عييب و ظلم يا ويلكم من الشعب كي يتعبى الكاس".
